Tag: dammika pani

  • ධම්මික පැණි අතිරේක ආහාරයක් ලෙසවත් නිෂ්පාදනය බැහැ

    ධම්මික පැණි අතිරේක ආහාරයක් ලෙසවත් නිෂ්පාදනය බැහැ

    සායනික පරික්ෂෘවෙන් අසමත්වූ කෑගල්ලේ ධම්මික බණ්ඩාරගේ පැණිය මින් ඉදිරියට නිෂ්පාදනය නොකරන්නැයි ඊයේ (06) දිනයේ ධම්මික බණ්ඩාරට ලිඛිතව දැනුම් දුන් බව දේශීය වෙදකම් ප්‍රවර්ධන, ග්‍රාමීය හා ආයුර්වේද රෝහල් සංවර්ධන හා ප්‍රජා සෞඛ්‍ය අමාත්‍යංශයේ ලේකම් කුමාරි වීරසේකර පවසයි.

    මෙම පැනිය ආහාර අතිරේකයක් ලෙස නිෂ්පාදනය කිරීමට හා භාවිතා කිරීමට ආයුර්වේද දෙපාර්තමේන්තුව මීට පෙර අනුමැතිය ලබාදී තිබිණද එම කාලසීමාව මේ වන විට අවසන්වී ඇති බවයි ලේකම්වරිය පවසා තිබේ.

    මෙම පැණිය පානය කිරීමෙන් කොවිඩ් වෛරසය සුවවන බවට කෑගල්ලේ ධම්මික වෙදමහතා දිගින් දිගටම ප්‍රකාශ කිරීමත් සමඟ එය සායනික පරීක්ෂණයකට යොමු කිරීමට මීට පෙර කටයුතු සම්පාදනය කර තිබිණි.

    කෙසේ වෙතත් අදාළ සායනික පරීක්ෂණයෙන් මෙම පැණිය පානය කිරීමෙන් කොවිඩ් සුව නොවන බවට තහවුරු වී ඇති බව විද්වත් කමිටුව සිය අවසන් වාර්තාවේ සඳහන් කර තිබේ.

    එම වාර්තාවේ සඳහන් වන්නේ ධම්මික පැනිය මගින් කොවිඩ් වෛරසයට එරෙහිව කිසිදු සාර්ථක ප්‍රතිඵලයක් අත්කර නොදෙන බවයි.

  • ධම්මික පැණිය රෝගීන්ට ලබාදීමට නුසුදුසුයි – සායනික වාර්තාවකින් හෙළිවෙයි

    ධම්මික පැණිය රෝගීන්ට ලබාදීමට නුසුදුසුයි – සායනික වාර්තාවකින් හෙළිවෙයි

    ධම්මික බණ්ඩාර නැමැත්තෙකු විසින් සකස් කළ ධම්මික පැණිය කොවිඩ් රෝගීන්ට ප්‍රතිකාර කිරීම සඳහා නුසුදුසු බව සායනික පරීක්ෂණවලින් තහවුරු වී ඇත.

    සෞඛ්‍ය අමාත්‍යාංශයේ උපදෙස් පරිදි රජරට විශ්වවිද්‍යාලයේ වෛද්‍ය පිඨය විසින් සිදුකල සායනික පරීක්ෂණයකින් මේ බව තහවුරු වී තිබේ.

    ඒ අනුව අනුරාධපුර ශික්ෂණ රෝහලේ ප්‍රතිකාර ලබන කොවිඩ් ආසාදිත රෝගීන් 68 දෙනෙකුට එම පැණිය ලබාදී නිරීක්ෂණය කර ඇත. එහෙත් කොවිඩ් රෝගීන්ට සුව වීමක් දක්නට නොලැබුණු බවයි රජරට විශ්ව විද්‍යාලයේ වෛද්‍ය පිඨයේ වෛද්‍ය සේනක පිලිපිටිය ප්‍රකාශ කර ඇත.

    නමුත් මෙම සායනික වාර්තාව මෙතෙක් කලක් ප්‍රමාද වීමට හේතුව කුමක්ද යන්න ගැටලුවකි. මීට මාස කිහිපයකට පෙර විශාල කතා බහක් ඇතිවෙමින් තිබුණු මෙවැනි දෙයක් පිළිබඳ ප්‍රමාද වී පරීක්ෂණ වාර්තාව නිකුත් කිරීම ගැන සැක මතුවේ.වතුපිටිවෙල මුලික රෝහලේ කොවිඩ් රෝගීන්ට ලබාදීමේදී 100% ප්‍රථිපල ලැබුණු බව සෞඛ්‍ය අමාත්‍යාංශය මිට පෙර නිවේදනය කර තිබුණි. එපමණක් නොව සෞඛ්‍ය ඇමතිවරිය විසින් ප්‍රසිද්ධියේ මෙම පැණිය පානය කරමින් මෙය අනියමින් ජනතාවට නිර්දේශ කරන ලදී.

    සියලු පරීක්ෂණ වාර්තා රජරට විශ්වවිද්‍යාලය විසින් සෞඛ්‍ය අමාත්‍යාංශය පත්කළ විද්වත් කමිටුවට යොමු කර ඇත.

    විද්වත් කමිටුවට පසුගිය බදාදා (28) රැස්වී මේ පිලිබඳව අධ්‍යනය කර ඇති අතර එය කොවිඩ් රෝගීන්ට ප්‍රතිකාර කිරීමට නුසුදුසු බව අනාවරණය වී තිබේ.

    කෙසේ වෙතත් විද්වත් කමිටු නිර්දේශය රජරට විශ්ව විද්‍යාලයට යොමු කිරීමෙන් පසු ස්ථිර වාර්තාවක් ලබන සතියේදී සෞඛ්‍ය අමාත්‍යාංශයට ලැබීමට නියමිතය.

    කොවිඩ් රෝගීන් 100%ක් සුවවන බවට ප්‍රකාශ කරමින් සකස් කරන ලද මෙම පැණිය පාර්ලිමේන්තු මන්ත්‍රීවරු ඇතුළු විශාල ජන කොට්ඨාශයක් ලබාගැනීමත් සමග සායනික පරීක්ෂණයක් කිරිමට සෞඛ්‍ය අමාත්‍යාංශය හා ආයුර්වේද දෙපාර්තමේන්තුව තීරණය කර තිබුණි.

    කෙසේ වෙතත් මෙම පැණියට ආයුර්වේද දෙපාර්තමේන්තුවේ මිල සුත්‍ර කමිටුවද අනුමැතිය ලබාදී ඇත.

     

  • එන්නත් බාරගන්න ‘පැණි’ ප්‍රමෝට් කරපු රාජ්‍ය ඇමති චන්න ජයසුමනත් ගිහින්

    එන්නත් බාරගන්න ‘පැණි’ ප්‍රමෝට් කරපු රාජ්‍ය ඇමති චන්න ජයසුමනත් ගිහින්

    ඉන්දීය රජය ප‍්‍රදානය කළ ඔක්ස්ෆර්ඞ් ඇස්ට‍්‍රාසෙනිකා කොවිෂීල්ඞ් කොවිඞ් මර්දන එන්නත් පළමු තොගය ඉන්දීය මහ කොමසාරිස් ගෝපාල් බග්ලේ විසින් ඊයේ (28දා) පෙරවරුවේ කොළඹ බණ්ඩාරනායක අන්තර් ජාතික ගුවන් තොටුපළේදී ජනාධිපති ගෝඨාභය රාජපක්ෂ වෙත බර දුන් අවස්ථාව සඳහා රාජ්‍ය ඇමති චන්න ජයසුමන සහභාගී වී සිටීම සම්බන්ධයෙන් සමාජ මාධ්‍ය තුළ සංවාදයක් ඇතිව තිබේ.

    එයට හේතුව ඖෂධ නිෂ්පාදනය, සැපයීම හා නියාමන රාජ්‍ය ඇමැති චන්න ජයසුමන පසුගිය කාලයේ කොවිඩ් මර්දනය කළ හැකි ආයුර්වේද ඖෂධයක් බව පවසමින් ධම්මික බණ්ඩාර නැමැත්තා විසින් නිපදවූ ධම්මික පැණියට රාජ්‍ය අනුමැතිය ලබාදීමට විශාල වෙහෙසක් ගත්තෙකු වීමයි.

    රාජ්‍ය ඇමතිවරයා ඊට පෙරද කොවිඩ් මර්දනය කළ හැකි බව පවසමින් සුදර්ශනී නම් පැණියක් රැගෙන රට වටේ යනු දැකිය හැකි විය.

    සමාජ මාධ්‍යවල අදහස් දක්වන්නන් දැන් එන්නත් ලබාගැනීමට රාජ්‍ය ඇමතිවරයා ගොස් සිටින්නේ රෙදි ඇඳගෙනදැයි ප්‍රශ්න කරමින් සිටියි.

  • පැණි කෝප්ප ගණන් බීපු පියල් නිශාන්තටත් කොවිඩ් – ධම්මික පැණි ප්‍රවර්ධනය කළ ආණ්ඩුව සද්ද නෑ

    පැණි කෝප්ප ගණන් බීපු පියල් නිශාන්තටත් කොවිඩ් – ධම්මික පැණි ප්‍රවර්ධනය කළ ආණ්ඩුව සද්ද නෑ

    කෑගල්ලේ ධම්මික බණ්ඩාර නැමැත්තා විසින් නිෂ්පාදනය කරනු ලැබූ පැණි පානය කළ බොහෝ දෙනෙකුට කොවිඩ් වෛරසය ආසාදනය වී ඇතිබව මේවනවිට අනාවරණය වෙමින් පවතියි.

    එහි අලුතින්ම වාර්තා වූ සිදුවීම වන්නේ රාජ්‍ය අමාත්‍ය පියල් නිශාන්ත හට කොරෝනා වෛරසය ආසාදනය වී තිබෙන බව සිදුකළ ඇන්ටිජන් පරීක්ෂණයකින් තහවුරු වී තිබීමයි.

    මේ හේතුවෙන් අමාත්‍යවරයා ගේ කාර්ය මණ්ඩලයේ සේවකයින් 10 දෙනෙකු නිරෝධායනයට යොමු කොට ඇති බවයි වාර්තා වේ.

    මේ අතර සමාජ මාධ්‍යවල සංසරණය වෙන ඡායාරූප හරහා පෙනී යන්නේ ආසියාවේ ලොකුම ටයර් කර්මාන්තශාලාව යයි හඳුන්වමින් පසුගියදා හොරණ ප්‍රදේශයේදී ජනාධිපතිවරයා විසින් විවෘත කෙරුණු කර්මාන්තශාලාව විවෘත කිරීමේ උත්සවයටද ඔහු සහභාගී වී ඇති බවයි.

    පසුගිය දෙසැම්බර් 10 වෙනිදා දේශීය වෛද්‍ය රාජ්‍ය අමාත්‍ය සිසිර ජයකොඩි විසින් එම ධම්මික බණ්ඩාර නැමැත්තා පාර්ලිමේන්තුවට කැඳවාගෙන විත් එම පැණීය කථානායක මහින්ද යාපා අබේවර්ධනට පිළිගන්වා තිබුණු අතර එහිදී පියල් නිශාන්ත ඇතුළු ආණ්ඩු පක්ෂ මන්ත්‍රීවරුන් කිහිපදෙනෙකුම එම පැණිය පානය කර තිබිණි.

    මේ අතර කොරෝනා වෛරසය ආසාදනය වීමෙන් වැලකී සිටීමට හැකිවනු ඇති බවට වූ විශ්වාස කර කෑගල්ලේ ධම්මික පැණිය තමා ද බිරිඳ ද සිව් නිවුන් දරුවන්ද පානය කළත් වෛරසය තම පවුලටම ආසාදනය වූ බව කෑගල්ල ප්‍රාදේශීය සභාවේ ශ්‍රී ලංකා පොදුජන පෙරමුණේ මන්ත්‍රී ශිලන්ත විජේපාල ප්‍රකාශ කර තිබේ.

    “ලංකාදීප” පුවත්පත සමග සාකච්ජාවකට එක්වෙමින් මන්ත්‍රීවරයා කියා සිටියේ තමන් ඇතුළු පවුලේ සියලු දෙනා මේ වන විට ඇඹිලිපිටිය ප්‍රදේශයේ යොවුන් සේනාංක ප්‍රතිකාර මධ්‍යස්ථානයේ ප්‍රතිකාර ලබමින් පසුවන බවයි.

    ධම්මික පැණිය පානය කළ තමාගේ සහෝදරයාට ද ඇතුළුව ඥාතින් සහ හිතවතුන් සැලකිය යුතු පිරිසකට ද වෛරසය ආසාදනය වී ප්‍රතිකාර සඳහා යොමු කොට ඇති බවයි මෙහිදී මන්ත්‍රීවරයා කියා සිටියේ.

    ” මට අවුරුදු 08 ක් වයසැති සිව් නිවුන් දරුවන් ඉන්නවා. ධම්මික වෙද මහත්තයා ඉන්න මගේ නිවසේ ඉදන් කිලෝමීටර් 02ක් දුරින්. ඔහුගේ අතින්මයි මම පැණි බෝතලය අර ගත්තේ.

    මස් මාළු හෝ බිත්තර නොකා මමයි පවුලේ අයයි කිව්ව විදිහට මගේ පවුලේ නෝනා, දරුවන් එක්ක පැණිය පාවිච්චි කළා.

    මුලින් ලොකු දුවට උණ හැදුනා. ඇන්ටිජන් පරීක්ෂණයෙන් හෙළිවුණා ඇය කොවිඩ් ආසාදිතයි කියලා. පස්සේ අනිත් දරුවන් තිදෙනාගේ, බිරිඳ සහ මගේ පරීක්ෂණ කළා. අපිත් කොරෝනා ආසාදිතයින් කියලා හෙළිවුණා. දැන් අපි පවුලම ඇඹිලිපිටියේ ප්‍රතිකාර මධ්‍යස්ථානයේ ප්‍රතිකාර ලබනවා.

    මම මේ පැණිය සාර්ථක වෙන්න කියලා මුහුණු පොතේ සටහනක් පවා තැබුවා. මේ පැණිය ලබා ගන්න ලංකාවේ හැම තැනින්ම මිනිස්සු ආවා. ඒ නිසා අපේ පළාතේ වෛරසය ව්‍යාප්ත වෙන්න එය බලපෑවා. නමුත් මේ පැණිය කොරෝනා වෛරසයට ප්‍රතිකාරය නොවේ” ඔහු කියා සිටියා.

    මෙම පැණිය කොවිඩ් වෛරසයට එරෙහි ඖෂධයක් ලෙස හඳුන්වා දෙමින් එය ප්‍රවර්ධනයට දායක වූවේ ආණ්ඩුව සහ ආණ්ඩු හිතවාදී මාධ්‍ය විසිනි. විශාල ජනතාවක් පැණි ලබා ගැනීම සඳහා එක්රැස් වූවේ ඊට පසුවයි. නමුත් ඉන්පසු දිගින් දිගටම කෑගල්ල ප්‍රදේශයේ පැණි පානය කළ ජනතාවට කොවිඩ් අසාදනය වීමේ පුවත් වාර්තා වෙමින් පවතියි. නමුත් පැණි ප්‍රවර්ධනය දායක වූ ආණ්ඩුව එහි වගකීම බාරගත යුතු වුවත් මෙතෙක් එවැනි දෙයක් සිදුව නැත.

  • මුළු ලෝකෙටම බැරිවුණු බෙහෙත මමයි හොයාගත්තේ, පැණිය බීපු සියලු දෙනාම නිරෝගීව ඉන්නවා – ධම්මික බණ්ඩාර කියයි

    මුළු ලෝකෙටම බැරිවුණු බෙහෙත මමයි හොයාගත්තේ, පැණිය බීපු සියලු දෙනාම නිරෝගීව ඉන්නවා – ධම්මික බණ්ඩාර කියයි

    කාලි මෑණියන් විසින් ලබාදුන් වරමක් අනුව තමන් නිපදවූ පැණිය බිව් සියලු දෙනා නිරෝගී වූ බව ධම්මික බණ්ඩාර නැමැත්තා පවසයි. ඔහු පවසන්නේ මෙම පැණිය පිළිබඳ ජයවර්ධන පුර විශ්ව විද්‍යාලය හරහා විද්‍යාත්මක සොයා බැලීමක්ද සිදුකළ බවයි.

    “මේ මුළු ලෝකෙම කාටවත් හොයාගන්න බැරිවුණු බෙහෙතක් තමයි මං හොයාගත්තෙ. ඒක මට පළමු ගෞරවය තියෙන්නෙ ශ්‍රී වීර මහා භද්‍ර කාලි මෑණියන්ට. මෑණියො තමයි මේ බෙහෙත දුන්නේ. මේ රටේ ඉහළ ප්‍රභූවරුන්ට, ඒ අයගේ දුවා දරුවන්ට, ඒ වගේම රාජ්‍ය සේවකයින්ට, ත්‍රිවිධ හමුදාවට, පොලිසියට වගේ සියලු දෙනාටම මං මේ බෙහෙත දීලා ඒ අය මං ගොඩක් නිරෝගී කරගත්තා.

    මං ගෞරවයෙන් ඉල්ලා සිටිනවා ඔය නිලධාරී මහත්තුරුන්ටත් මේ පරීක්ෂණය කරපු අයටත් මාධ්‍යයටත් මං කියනවා මේක හරි ගවේෂණයක් කරන්න. හරියට තොරතුරු දැනගෙන මඩ ගහන්න. ගහන තරමක් ගහන්නෙ මඩ. මේ බෙහෙතට අගෞරව කරන්න එපා. මේ බෙහෙත බීලා බොහොම හොඳට නිරෝගී වූ අය ඉන්නෙ.

    දැන් ආයුර්වේද සභාවෙන් අනුමැතියක් ලැබුණා මේ බෙහෙත හදලා දෙන්න කියලා. ඒ වගේමයි රටේ ඉහළම අය කිව්වා මේ බෙහෙත හදලා කිසිම ප්‍රශ්නයක් නැතුව දෙන්න කියලා. මං වඩුබාස් කෙනෙක් වෙන්න පුළුවන්, මේසන්බාස් කෙනෙක් වෙන්න පුළුවන් හැබැයි මං හොයාගත්ත බෙහෙත කියන්නෙ මට වරමකින් දුන්නු දෙයක්. ඒ වරමෙන් දුන්නු බෙහෙත හරියාකාරවම අපි හොයලා බැලුවා, විද්‍යාත්මකව හොයලා බැලුවා. තව අපි විද්‍යාත්මකව හොයාගත්තු දෙයක් තියෙනවා. මේකෙ තියෙනවා මේ බෙහෙත ගැන සම්පූර්ණ විස්තරයක්. මේ පරීක්ෂණය කරලා තියෙන්නෙ ජයවර්ධනපුර විශ්වවිද්‍යාලයෙන්. මේක අපි එළියට දෙන්නෑ මාධ්‍යවලට. මොකද එතුමලා ඉල්ලීමක් කරලා තියෙනවා මේක අපි තව ටික දවසකින් දෙමු, රජයෙන් හොයන්න දුන්නු දේ හෙව්වට පස්සෙ කියලා.

    ධම්මික බණ්ඩාර මේ බව පැවසුවේ ඊයේ (29) පැවති මාධ්‍ය හමුවක් අමතමිනි.

    මේවනවිට විවිධ ප්‍රදේශවලින් ධම්මික පැණිය බිව් පිරිස්වලට කොවිඩ් වෛරසය වැළඳී ඇති සඳහන් පුවත් වාර්තා වෙමින් පවතියි. අමතරව ධම්මික පැණි බිව් කතානායකවරයාද තම කාර්ය මණ්ඩල සාමාජිකයෙකුට කොවිඩ් වැළඳීම නිසා ස්වයං නිරෝධායනය ලක් කර තිබේ.

  • ධම්මික පැණි පූජා කරන්න යනකොට බුදුවූ බව කිව් සිරිසුමනත් යන්නෙ ඇයි?

    ධම්මික පැණි පූජා කරන්න යනකොට බුදුවූ බව කිව් සිරිසුමනත් යන්නෙ ඇයි?

    ධම්මික බණ්ඩාර විසින් නිපදවූ බව කියන පැණියට ජනතාව අතර ජනප්‍රිය කරවීමේදී ජාතික තලයේ මාධ්‍ය, සමාජ මාධ්‍ය හා රජය ඊට ප්‍රභල අනුග්‍රහයක් ලබාදෙනු දැකිය හැකිවිය. ඔවුන් නිර්මාණය කරන ලද නාටකයේ ඉතා උද්වේගකර අවස්ථාවක් ඊයේ අටමස්ථානාධිපති හිමියන් ඉදිරියේ රඟ දැක්වුණි.

    ඊයේ අනුරාධපුරයට සිය ආධාරකරුවන් සමග ගිය ධම්මික බන්ඩාර, පළමුවෙන් අනුරාධපුර අටමස්ථානාධිපති පල්ලේගම ධම්මරක්ඛිත සිරිනිවාස හිමි හමුවී පැණිය බෝතලයක් ලබා දෙන ලදී. එයින්පසුව ඔහුගේ පැණිය ශ්‍රී මහ බෝධිය වෙත පූජා කිරීමට පැමිණි නමුත් ඔහුට බෝධිය අසළටම යාමට අවසර නොලැබිණි.

    පසුව ධම්මික බණ්ඩාර පිරිසක් සමග වේගයෙන් අටමස්ථානාධිපති හිමි වෙත ගොස් ඇති අතර ඔහු අටමස්ථානාධිපති පල්ලගෙම සිරිනිවාස හිමි ඉදිරියේ හිඳ මෙසේ ප්‍රකාශ කර ඇත්තේ ලෝකයට සුවසෙත සැදීමට මම මේ ඖෂධය සකස් කළා. ඒක බෝධින් වහන්සෙ වෙත පුද කිරීමට ආවෙ. ඇයි මට අවසර නොදුන්නෙ? මම කාලි, ඔබ වහන්සෙගෙ අම්මා!” යනුවෙනුයි. කෙසේ වෙතත්, පසුව පහළ මළුවට ඖෂධය පූජා කිරීමට ධම්මික බණ්ඩාර හට අවසර හිමිවූ බව වාර්තා විය.

    කෑගල්ලේ ධම්මික බණ්ඩාර විසින් නිපදවනු ලැබූ පැණිය රැගෙන ශ්‍රී මහා බෝධිය වෙත යන අවස්ථාවේ තමන් බුදු වූ බව පවසා පසුව තමන් කළ ක්‍රියාව පිළීබදව මහනාහිමිවරුන්ගෙන් සමාව ගත් බොරැල්ලේ සිරිසුමන නම් භික්ෂුවද සිටිනු දක්නට ලැබීම පිළිබඳ සමාජ මාධ්‍ය තුළ සංවාදයක් ආරම්භ වී තිබේ. ඊට අමතරව මෙම සංවාදය තුළදී එම භික්ෂුව

    අනුරාධපුරයට සිය ආදාරකරුවන් සමග ගිය ධම්මික බන්ඩාර, පළමුවෙන් අනුරාධපුර අටමස්ථානාධිපති පල්ලේගම ධම්මරක්ඛිත සිරිනිවාස හිමි හමුවී පැණිය බෝතලයක් ලබා දෙන ලදී. එයින්පසුව ඔහුගේ පැණිය ශ්‍රී මහ බෝධිය වෙත පූජා කිරීමට පැමිණි නමුත් ඔහුට බෝධිය අසළටම යාමට අවසර නොලැබිණි.

    නමුත් ධම්මික බණ්ඩාර වෙනුවෙන් දිගින් දිගටම විශාල ප්‍රචාරයක් ලබාදෙමින් තිබූ මාධ්‍ය ධම්මරක්ඛිත හිමියන්ට තමන් කාලි බවත් උන්වහන්සේගේත් ‘අම්මා’ කියමින් කෑගැසූ දර්ශනය කපා හැර තිබුණි.

    ඒ එවැනි දර්ශනයකින් ඔවුන්ගේ ව්‍යාපෘතිය අවුල්වන නිසා විය යුතුය.

    මෙහි ඇති අනෙක් කරුණ නම් කෑගල්ලේ ධම්මික බණ්ඩාර විසින් නිපදවනු ලැබූ පැණිය රැගෙන ශ්‍රී මහා බෝධිය වෙත යන අවස්ථාවේ තමන් බුදු වූ බව පවසා පසුව තමන් කළ ක්‍රියාව පිළීබදව මහනාහිමිවරුන්ගෙන් සමාව ගත් බොරැල්ලේ සිරිසුමන නම් භික්ෂුවද සිටිනු දක්නට ලැබීමයි. එම භික්ෂුව සමඟ කැලණි ගඟ අසල සිවුරුගල දී විශේෂ පූජාවක් අතරතුර නාග ලේකයෙන් සර්වඥ ධාතූන් 14 ක් රැගෙන නාගයන් වැඩි බව පවසමින් විශාල ප්‍රචාරයක් ගෙන ගිය උදාර මධුසංඛ නැමැත්තා සිටින ඡායාරූප ද නැවත කරළියට පැමිණෙමින් පවතියි.

    මෙම උදාර මධුශංක නැමැත්තාට නා ලොවින් ලැබුණු බව කිවූ ධාතූන් සහිත කරඬුව කැළණිය විහාරස්ථානයේ ධාතූ මන්දිරයේ තැන්පත් කෙරුණු අතර දින කිහිපයක් සැදැහැවතුන්ගේ වන්දනාමානයට ප්‍රදර්ශනය කෙරිණි. ඒ අවස්ථාවේද මාධ්‍ය මෙය දිගට හරහට ප්‍රචාරය කරන ලදී. මෙය සිදුවුවේ පසුගිය ජනාධිපතිවරණය කට උඩ තිබියදීය. මෙහිදී ධාතු බලන්නට එන සැදැහැවතුන්ට නෙළුම් පොහොට්ටු ලබාදීමක් පවා සිදුව තිබුණි.

    ඊට අමතරව මෙහිදී ධාතු ලැබීම ගැන විශේෂ ප්‍රකාශයක් කරන කැළණිය විහාරස්ථානයේ විහාරාධිපති මහින්ද බුද්ධරක්ඛිත හිමි පවසන්නේ 2020ට හොඳ නායකයෙක් ලැබී හොඳ දේශයක් ගොඩනගන්න පුළුවන් වන බවට වන සුබ පණිවිඩයද ඒ සමඟ ලැබුණු බවයි.

    මේ අනුව මෙම සිදුවීම් සම්බන්ධ පුද්ගලයන් එකිනෙකා සමඟ සිටිනු දක්නට ලැබීම හුදු අහම්බයක් නොවන බව එම සෑම සිදුවීමකටම ලැබෙන මාධ්‍ය ප්‍රචාර සහ රාජ්‍ය අනුග්‍රහ හරහා පැහැදිලිවේ. ඒ අනුව කාලයෙන් කාලයට මෙවැනි පුද්ගලයන් සැබෑ ලෙස කරනුයේ තම විවධ දේශපාලන ව්‍යාපෘති වෙනුවෙන් මත හැසිරවීමයි. මෙවැනි සිදුවීම් සම්බන්ධව විරෝධතා දක්වන බොහෝ පිරිස් කියන පරිදි එය හුදු මෝඩකමක් හෝ උමතුවක් ලෙස බැහැර කළ නොහැක්කේ එහෙයිනි.