17
Sun, Dec

නොවැම්බර් 27 වැනිදාට යෙදෙන මහවිරු දිනයට සමගාමීව මහවිරු සතිය ඊයේ (21) සිට ආරම්භ වන හෙයින් යාපනය සරසවියේ ඇතුලු උතුරු පලාතෙ ස්ථාන කිහිපයකදී මහවිරු සතිය ආරම්භ කොට ඇත.
මේ අනුව ඊයේ රත්‍රිෙය් යාපනය විශ්වවිද්‍යාලයේ ඉදිරිපට මහවිරු දිනය වෙනුවෙන් ප්‍රතිමාවක් සකස් කොඩි වැල් ඇද කොට එය විදුලි පහනකින් දල්වා මහවිරු සතිය ආරම්භ කිරීමට එහි සිසුන් පිරිසක් විසින් පියවර ගෙන තිබුණි.

මේ අතර වන්නි විලාන්කුලම් ප්‍රදේශයේදී පෙර මහවිරු සොහොනක් තිබූ ස්ථානයේ මල්පහන් දැල්වීමට මිය ගිය මහවිරුවන්ගේ ඥාතීන් විසින් පියවර ගෙන තිබුණි.
1982 වසරේ නොවැම්බර් 27 වනදා කොටි සංවිධානයේ ප්‍රථම සාමාජිකයා වූ කර්නල් එස්. ශංකර් නැමත්තෙකු මිය යාම මූලික කොට ගෙන මෙම මහ විරු දිනය හා සතිය නම් කොට තිබුණි.

පුද්ගලයින් ලක්ෂයකින් එක් අයෙකුට පමණක් වැළදෙන සර්කෝමා රෝගයෙන් පීඩා විදින පාසල් ශිෂ්‍යයෙකු යළිත් දෙපයින් නැඟී සිට තම ජීවිත සිහිනය ජය ගැනීමට ජනතා උපකාරය අයැද සිටින පුවතක් වාර්තා වෙයි.

ඔහු නමින් ජී.ජී රුක්ෂාන් නයනකාන්ත(19) වන අතර හැටන් - වටවල - ටෙම්පල්ස්ටෝ ජනපදයේ පදිංචි කරුවෙකි.

හැටන් ශ්‍රිපාද විද්‍යාලයේ ප්‍රාථමික අධ්‍යාපනය හදාරා ඇති නයනකාන්ත 6 වන ශ්‍රේණියේ සිට කුරණෑගල මහව විජයබා ජාතික පාසලේ අධ්‍යාපනය ලබමින් සිටියේය.

මෙම වසරේ අගෝස්තු මාසයේ තාක්ෂනීක අංශයෙන් අපොස උසස්පෙළ විභාගයට පෙනී සිටීම සඳහා අධ්‍යන කටයුතු කරමින් සිටියදී මීට මාස අටකට පමණ පෙර අසනීප වී තිබේ.

මුලින්ම පිට කොන්ද ප්‍රදේශයේ කසේරුකාව මත ගැටිත්තක් පැමිණ එය විශාල ගෙඩියක් දක්වා වර්ධනය වීම නිසා මහනුවර රජයේ රෝහලේදී සැත්කමකට භාජනය කර තිබේ.

කිලෝ හතරාමාරක් පමණ වූ එම ගෙඩිය ඉවත් කිරීමෙන් පසු මාස කිපයක් හොඳ සෞඛ්‍ය තත්ත්වයෙන් පසු වුවද නැවතත් එම ස්ථානයේ ගෙඩියක් හට ගෙන තිබේ.

ඒ සම්බන්ධව නැවත වෛද්‍ය පරීක්ෂණ කිරීමෙන් අනතුරුව තහවුරු වී ඇත්තේ නැවතත් සැත්කමකින් ඉවත් කළ හැකි බවත්, නමුත් ඔහුගේ ඉනෙන් පහල කොටස සදා කාලිකවම අකර්මණ්‍යවීමේ දැඩි අවධානමක සම්බාවිතාවක් පවතින බවය.

පසුව ඔවුන් සියලු වෛද්‍ය වාර්තා ඉන්දියාවේ සුදුසුකම් ලත් වෛද්‍ය වරයෙක් වෙත යොමු කිරීමෙන් පසු සතුටු දායක පිළිතුරක් ලැබී තිබේ.

එයට අනුව දින 90 වකදී සම්පුර්ණ හා ස්ථීර සුවය ලබා දියහැකි බව සනාත කර තිබේ.

නමුත් ඒ සඳහා යොමු වීමට රුපියල් ලක්ෂ 14 ක පමණ මුදලක් අවශ්‍ය බව ඔහුගේ මව්පියන් පවසයි.

ජි .සද්ධාතිස්ස නම් ඔහුගේ පියා විශ්‍රාමික ගුවන් හමුදා නිලධාරියෙක් වන අතර එච්.එම් කරුණාවති නම් ඔහුගේ මව පෙරපාසල් ගුරුවරියක් වන අතර නයනකාන්තගේ අසනීප තත්ත්වය නිසා රැකියාවට සමු දී තිබේ.

තම දරුවා සුව කිරීමේ දැඩි අවශ්‍යතාවයක් ඇතත් මුදල් නොමැති කමින් දැඩි ලෙස අසරණ වී ඇති බවත් එම නිසා ඔවුන් ඉල්ලා සිටින්නේ තම දරුවා නැවතත් දෙපයින් නගා සිටුවීම සඳහා ඉන්දියාවේ ගෙන ගොස් ප්‍ර‍තිකාර කිරීමට මුදල් ආධාර කර උපකාරී වන ලෙසයි.

උසස් පෙළ විභාගයෙන් පසු උසස් අධ්‍යාපනයට යොමුවී ඉංජිනේරුවෙකු වී රටට සේවය කිරීමට සිහින දකිමින් සිටි රුක්ෂාන් නයනකාන්ත දෙපයින් නගා සිටුවීම සඳහා උපකාර කිරිමට කැමති කෙනෙක් සිටිනම් 0719069590 / 077 3454844 දුරකථන අංක වලට අමතන ලෙස ඔහුගේ මව්පියන් පවසයි.

අධ්‍යයන පොදු සහතික පත්‍ර සාමාන්‍ය පෙළ විභාගය දෙසැම්බර් 12 සිට 21 දක්වා පැවැත්වීමට විභාග දෙපාර්තමේන්තුව තීරණය කොට ඇත.

මෙවර එම විභාගය සඳහා මධ්‍යස්ථාන 5116 දී අයදුම් කරුවන් හයලක්ෂ අසූඅටදාස් පන්සිය හැත්තෑ තුනක් පෙනී සිටිනු ඇත.

සැර මත්පැන් පානය කරන පුද්ගලයින්ට විකල්පයක් ලෙස කිතුල් රා පානය කිරීමට සහනයක් ලබා දිය යුතු බව ඌව පළාත් ප‍්‍රධාන අමාත්‍ය  චාමර සම්පත් දසනායක  පවසයි.
 ඌව පළාත් පුස්තකාල ශ්‍රවණාගාරයේ ඊයේ(21) පැවති වෙද සමුළුවකට එක්වෙමින් දසනායක මහතා මෙම අදහස් පළ කළේය.
 
කිතුල් රා ලෙඩ රෝගවලින් වළක්වා ගත හැකි ඖෂධීය ගුණයන්ගෙන් හෙබි දේශීය පානයක් වන බවත්, අතීතයේ මුතුන්මිත්තන් රා පානය කිරීම හේතුවෙන් අවුරුදු 100 කට වැඩි කාලයක් ආයුෂ හිමි වු බව ද ඔහු සඳහන් කළේය.
 
බීර සඳහා රජය බදු සහන ලබා දී ඇති බවත්, කිතුල් රා සඳහා ද යම් සහනයක් ලබා දී එය ප්‍රචලිත කිරීම සුදුසු බව ද අමාත්‍යවරයා මෙහිදී වැඩිදුරටත් සඳහන් කළේය.

ළමයින් ළමා නිවාසගත නොකට කැපකරු මාපිය ක්‍රමය යටතේ රැකබලා ගැනීමේ ක්‍රමයක් මෙරට තුළ වඩා ක්‍රමවත්ව ක්‍රියාත්මක කිරීම කෙරෙහි ජාතික ළමා ආරක්ෂන අධිකාරියේ අවධානය යොමුව තිබේ.

ළමා නිවාසගතව සිටින දරුවන්ට පවුලක් තුළ ජීවත්වීමට අවස්ථාවක් ලබාදීම මෙමඟින් සිදුකිරීමට නියමිතය.

යටත් විජිත සමය තුළ ළමා නිවාස සංකල්පය හඳුන්වා දුන්න ද එය වර්තමානයේ බ්‍රිතාන්‍ය තුළ හෝ ක්‍රියාත්මක නොවන බව ජාතික ළමාආරක්ෂක අධිකාරිය සඳහන් කළේය.

එම නිසා ළමා නිවාසවලින් බැහැරව විකල්ප ළමා රැකවරණ ඔස්සේ ළමුන් රැකගැනීමේ ක්‍රම පිළිබඳව අවධානය යොමුකොට තිබේ.

ළමා නිවාසවලින් බැහරව විකල්ප ළමා රැකවරණ ක්‍රම ඔස්සේ ළමයින් රැකබලා ගැනීමේ ක්‍රම පිළිබඳව විශේෂ ජාත්‍යන්තර සමුළුවක් පසුගියදා මෝල්ටා රාජ්‍යයේ දී පවත්වනු ලැබීය.

එහිදී ද කැපකරු මාපිය යටතේ ළමුන් රැකබලා ගැනීමේ ක්‍රමය පිළිබඳව වැඩි අවධානයක් යොමුවු බව ජාතික ළමාරක්ෂක අධිකාරිය සඳහන් කළේය.

ඒ අනුව ශ්‍රී ලංකාව තුළ ද මෙම වැඩපිළිවෙළ ජාතික ළමාරක්ෂක අධිකාරිය හා ඒකාබද්ධව ක්‍රියාත්මක කිරීමට සැළසුම් කර තිබේ.

අග්‍රමාත්‍ය රනිල් වික්‍රමසිංහ මහතා බැඳුම්කර වංචාව පිළිබඳ සොයා බැලීමේ ජනාධිපති  විමර්ශන කොමිසන් සභාව වෙත අද  පැමිණියේ  ය.
කොමිසම විසින් ඉදිරිපත් කළ ප්‍රශ්න සම්බන්ධයෙන්  යොමු කළ ලිඛිත පිළිතුරුවලට අදාළව වැඩිදුර පැහැදිලි කිරීම් සඳහා අග්‍රමාත්‍යවරයා අද දිනයේ කොමිසම හමුවේ පෙනී සිටියේය.
අදාළ කොමිසම වෙත ප්‍රකාශයක් ලබාදීමට ස්වේච්ඡාවෙන් ඉදිරිපත් වන බව අග්‍රමාත්‍ය  රනිල් වික්‍රමසිංහ මහතා මීට පෙර දැනුම් දී තිබුණි.
මේ අතර බැඳුම්කර කොමිසමේ වාර්තාව ලබන මස 08 වනදා වන විට ජනාධිපතිවරයා වෙත බාරදීමට නියමිතය.
බැඳුම්කර ගනුදෙනුවට අදාළව ලිඛිත ප්‍රශ්නාවලියක් කොමිසම විසින් අග්‍රාමාත්‍යවරයා වෙත යොමු කර තිබිණි.
ඒ අනුව එම ප්‍රශ්නාවලියට ද අග්‍රාමාත්‍යවරයා පිළිතුරු යවා ඇති අතර මෙම පිළිතුරු සම්බන්ධයෙන් වැඩිදුර කරුණු විමසීම සඳහා අග්‍රාමාත්‍යවරයා මෙලෙස බැඳුම්කර කොමිසමට කැඳවා ඇති බව වාර්තා වේ.
කෙසේවෙතත් බැඳුම්කර ගනුදෙනුවට අදාළව පමණක් මෙහිදී ප්‍රශ්න කෙරෙන බව බැඳුම්කර කොමිසම අග්‍රාමාත්‍ය රනිල් වික්‍රමසිංහ මහතා වෙත දැනුම්දී තිබේ.
මේ අතර අද දිනයේ සාක්ෂි විමසනු ලැබුවේ නීතිපතිවරයා විසිනි.
නීතිපති ප්‍රකාශය ලබාදීමෙන් පසු මාධ්‍ය වෙත අදහස් දැක්වූ අග්‍රමාත්‍ය රනිල් වික්‍රමසිංහ මහතා සඳහන් කළේ ශ්‍රී ලංකාවේ අග්‍රමාත්‍යවරයෙකු තම පාලන කාලය තුළදී එවැනි ප්‍රකාශයක් ලබා දුන් පළමු අවස්ථාව මෙය බවයි.
මමත්; අපේ පක්ෂයේ සභාපති තුමාත්; ලේකම් තුමාත්; කිසිම පැකිලීමක් නැතිව බැඳුම්කර කොමිසම හමුවට ඉදිරිපත් වුණා. වැරදි වෙන්න පුළුවන්; අඩුපාඩු වෙන්න පුළුවන්; නමුත් අපි ඒවා හංගන්නේ නැහැ. අඩුපාඩු හදාගෙන යහ පාලනයට ඉදිරියටම  ගෙනියනවා.
අග්‍රාමාත්‍ය රනිල් වික්‍රමසිංහ මහතා මේ බව ප්‍රකාශකරන ලද්දේ අද (20) බැඳුම්කර කොමිසම හමුවේ සාක්ෂි දීමෙන් පසුව රැස්ව සිටි මාධ්‍යවේදීන් අමතමිනි. 

පාර්ලිමේන්තු මන්ත‍්‍රී විමල් වීරවංශගේ නායකත්වයෙන් යුතු ජාතික නිදහස් පෙරමුණේ ප‍්‍රධාන ලේකම් ලෙස කටයුතු කල ප‍්‍රියන්ජිත් විතාරණ එම ධුරයෙන් ඉල්ලා අස්වී තිබේ.ඊයේ  පස්වරුවේ පැවති එම පක්‍ෂ දේශපාලන මණ්ඩලයට ලිඛිතව සිය ඉල්ලා අස්වීම බාර දී ඇති බවද වාර්තා වෙයි.

ස්ථිර ලේකම්වරයෙකු පත් කර ගන්නා තෙක් වැඩ බලන ලේකම්වරයා ලෙස නීතීඥ කපිල ගමගේ පත් කර ඇත.
මේ අතර ප‍්‍රියන්ජිත් විතාරණ මහතාගේ ෆේස්බුක් ගිණුමේ ඔහු විසින් සටහනක් තබා ඇත්තේ අද දින පටන් තමන් ජාතික නිදහස් පෙරමුණු ප‍්‍රධාන ලේකම් ධුරයෙන් ඉල්ලා අස්වන බවත් සහාය දුන් සියල්ලන්ට ස්තුතිය පල කරන බවත්ය.

සෞඛ්‍යමය හා පුද්ගලික හේතුන් මත ප‍්‍රියන්ජිත් විතාරණ එම ධුරයෙන් ඉල්ලා අස්වන බව වාර්තා වේ.

සෙවනගල සීනි කම්හල විකුණා දැමීමට එරෙහිව එම කම්හලේ සේවකයින් ඊයේ දින පස්වරු 2.00 සිට අඛණ්ඩව වැඩවර්ජනයක නිරත වෙන බව සෙවනගල සීනි සමාගම් ඒකාබද්ධ වෘත්තීය සමිති සන්ධානය පවසයි.

ආණ්ඩුවේ ප්‍රධාන ආර්ථික උපායමාර්ගයක් ලෙස සිදු කෙරෙමින් පවතින පෞද්ගලීකරණ ප්‍රතිපත්තිය යටතේ ඉදිරියේදී මෙම කර්මාන්ත ශාලාව විකුණා දැමීමට ආණ්ඩුව තීරණය කර ඇති බවත් එම ක්‍රියාවලියට එරෙහිව කටයුතු කරන බවත් එම සන්ධානය වැඩිදුරටත් පෙන්වා දෙන ලදි.

ගාල්ල පොලිස් බල ප්‍රදේශයේ ග්‍රාම සේවා වසම් 06කට පනවා තිබූ ඇදිරි නීතිය ඉවත් කළ ද තවදුරටත් ආරක්ෂක හමුදා සාමාජිකයින් එම ප්‍රදේශයේ යෙදවීමට පියවර ගෙන තිබේ.

ගාල්ල පොලිස් වසමේ ඇති වූ නොසන්සුන්කාරී තත්ත්වය පාලනය කිරීම සඳහා ග්‍රාම සේවා වසම් 06කට ඊයේ පස්වරු 06.00 සිට පොලිස් ඇදිරි නීතිය යෙදවීමට පියවර ගත්තේය.

වැලිපිට මෝදර, මහහපුගල, රුක්වත්ත, ගිංතොට, පියදිගම සහ කුරුදුවත්ත යන ග්‍රාම සේවා වසම් 06ට පැන වූ ඇදිරි නීතිය අද උදෑසන 09.00ට ඉවත් කෙරුණි.

දෙපිරිසක් අතර ඇති වූ නොසන්සුන්කාරී තත්ත්වය හේතුවෙන් අදාළ ප්‍රදේශවල ආරක්ෂාව උදෙසා මෙම පියවර ගත් අතර කලහාකාරී ලෙස හැසිරුණු පුද්ගලයින් 19 දෙනෙකු පොලීසිය මඟින් අත්අඩංගුවට ගෙන තිබුණි.

අත්අඩංගුවට ගත් සැකකරුවන් අද දිනයේ ගාල්ල මහේස්ත්‍රාත්වරයා හමුවට ඉදිරිපත් කිරීමට පියවර ගන්නා බව පොලිස් මාධ්‍ය ප්‍රකාශක කාර්යාලය සඳහන් කළේය.

මේ අතර ප්‍රදේශයේ ආරක්ෂාව තහවුරු කිරීම සඳහා පොලිස්පති පූජිත් ජයසුන්දර මහතාගේ උපදෙස් පරිදි එම ප්‍රදේශ වල රාජකාරී සඳහා විශේෂ පොලිස් කණ්ඩායම් තවදුරටත් යොදවා ඇති බව පොලිස් මාධ්‍ය ප්‍රකාශක පොලිස් අධිකාරී රුවන් ගුණසේකර මහතා සඳහන් කළේය.

පොලිස් නිලධාරීන් 200ක් සහ පොලිස් විශේෂ කාර්ය බලකා නිලධාරීන් සියයකට අධික ප්‍රමාණයක් එම ප්‍රදේශයේ රාජකාරී සඳහා යොදවා තිබේ.

මිට අමතරව ආරක්ෂක හමුදා කණ්ඩායම් කිහිපයක් ද යොදාවා ඇති බව යුද හමුදා මාධ්‍ය ප්‍රකාශක මේජර් ජෙනරාල් රොෂාන් සෙනෙවිරත්න මහතා සඳහන් කළේය.